بۇگىن الماتى جۇرتى, جۋرناليستەر مەن جازۋشىلار ءابىلفايىز ىدىرىسوۆتى سوڭعى ساپارعا شىعارىپ سالدى.
الماتى قالاسىنىڭ اكىمى باقىتجان ساعىنتاەۆ قازاقستان پرەزيدەنتى قاسىم-جومارت توقاەۆتىڭ قالام ۇستاپ جۇرگەن قازاق جۋرناليستەرىنىڭ ۇلى ۇستازىنىڭ ارتىندا قالعان ۇلى ەرلان ءابىلفايىز ۇلىنىڭ اتىنا جولداعان كوڭىل ايتۋ حاتىن وقىپ بەردى.
«ارداقتى اكەڭىز, پەداگوگ-عالىم ءابىلفايىز ىدىرىس ۇلىنىڭ دۇنيەدەن وتۋىنە بايلانىستى اۋىر قايعىڭىزعا ورتاقتاسىپ كوڭىل ايتامىن. حالقىمىزعا تانىمال جازۋشى, قازاقستاننىڭ ەڭبەك سىڭىرگەن قايراتكەرى ءابىلفايىز ىدىرىسوۆتىڭ قازاق جۋرناليستيكاسىنىڭ دامۋىنا قوسقان ۇلەسى مول. مارقۇمنىڭ يمانى سالامات, جانى ءجانناتا بولسىن. اۋلەتتەرىڭىزگە الداعى ۋاقىتتا اماندىق پەن جاقسىلىقتار تىلەيمىن» دەگەن مەملەكەت باسشىسى كوڭىل ايتۋ جەدەل حاتىندا.
ودان كەيىن ءسوز العان سەناتور مۇحتار قۇل-مۇحامەد قازاقستاندا جۇمىس ىستەپ جۇرگەن جۋرناليستەردىڭ ءبارى دەرلىك ءابىلفايىز اعانى قۇرمەت تۇتاتىنىن, ءوزىنىڭ دە ۇلى ۇستازدىڭ الدىن كورىپ, تاربيەسىن العان شاكىرتى ەكەنىن ەسكە سالىپ ءوتتى.
ء«ابىلفايىز اعا وسىدان 25 جىل بۇرىن اۋىر دەرتكە شالدىقتى. «و دۇنيەدەن ءوتىپ كەتكەنىم ارتىق ەدى» دەگەن اۋىر ءسوزدى ءوز اۋزىنان ەستىگەنمىن. زاريا جەڭگەمىز ابەكەڭدى بالاسىنداي كۇتتى, ماحابباتىمەن اياعىنان تىك تۇرعىزدى. ۇلى ۇستازىمىز ماحابباتتىڭ, قالامنىڭ قۇدىرەتىنە سۇيەندى. سول قالام ابەكەڭە 30 جىل ءومىر سىيلادى. "تاڭشولپان" اتتى روماندار سەرياسىن دۇنيەگە اكەلدى. ونى ولجاس اعا ورىس تىلىنە اۋداردى» دەدى مۇحتار قۇلمۇحامەد.
ال قازاقتىڭ ۇلى اقىنى ولجاس سۇلەيمەنوۆ كىشى دوسى, مارقۇمنىڭ ۇلى ەرلان ىدىرىسوۆقا كوڭىل ايتا وتىرىپ «سەنىڭ بويىڭداعى ەڭ جاقسى قاسيەت – اتا-اناڭنان اۋىستى. ەندى سەن اكەڭنىڭ ءومىرىنىڭ جالعاسىسىڭ. ءومىر بولسا, الداعى ۋاقىتتا اكەڭ تۋرالى مىندەتتى تۇردە جازامىن. بەرىك بول!» دەپ لەبىزىن ءبىلدىردى.
ءابىلفايىز ىدىرىس ۇلى – زەردەلى زەرتتەۋشى, ۇلكەن عالىم. جاس ۇلعايعان شاقتا قولعا قالام الىپ, كوركەم پروزاعا كىرىسۋ ەكىنىڭ ءبىرىنىڭ جۇرەگى داۋالامايتىن ءىس. ونداي جۇرەكتى قالامگەر تەك قازاقتا ەمەس, الەم ادەبيەتىندە دە ساۋساقپەن سانارلىق.
جاسى الپىستان اسقان سوڭ, كوركەم شىعارما جازۋعا وتىرىپ, ءتورت كىتاپتى «تاڭشولپان» رومانىن دۇنيەگە اكەلدى. بۇل, ءبىر سوزبەن ايتقاندا, ءومىردى شىن ءسۇيۋدى ءھام ءمولدىر ماحابباتتى جىرلاعان شىعارما. مۇنى ءاربىر جاس وتە ءسۇيىپ وقيتىنى دا سودان. ابەكەڭنىڭ اقىل توقتاتقان جاستا ءوزى اسا قۇرمەتتەيتىن م. اۋەزوۆ تۋرالى «اۋەزوۆكە ىڭكارلىك» دەگەن عىلىمي-ەسسە كىتابىن جازعانى دا ۇلكەن ەرلىك.
ءا.ىدىرىسوۆتىڭ «ادامزات مادەنيەتىنىڭ وركەنى», «قاراقايلىنى بيلەگەن قازاقتار», «قازاقتىڭ اتتارى بەيمالىم پاتشالارى, باسپاگەرلەرى», «Skun كاساك-كوسەم قازاق», «تەرەڭ تاريحتىڭ وشپەس ءىزى», «احاڭ مەن «قازاق» گازەتى جايلى اقيقات» سياقتى زەرتتەۋلەرىن اتاۋعا بولادى.
ءابىلفايىز اعا كوزى تىرىسىندە اينالاسىنداعىلارعا كىسىلىك دەگەن ءومىر فورمۋلاسىنىڭ شەشىمىن ءوز بولمىسى ارقىلى تانىتىپ كەتتى. ول – ۇستاز, ول - اكە. ول – جاقسى جار. ۇلت اقساقالى, جۋرناليستيكانىڭ ابىزى, ءتىپتى ماڭگىلىك ماحابباتتىڭ ابىزى دەڭگەيىنە جەتتى.
ءابىلفايىز ىدىرىسوۆ بۇگىن كەڭساي-2 قورىمىندا, تاڭشولپانى اتانىپ كەتكەن جان-جارى زاريا جەڭگەمىزدىڭ قاسىنا جەرلەندى.
اعايدىڭ الدىن كورگەن شاكىرتتەرىنىڭ بارىندە كوزى تىرىسىندە ءوزىڭ ءالى بالا سەزىنەتىندەي ءبىر كوڭىل بولاتىن. داۋرەن ءوتتى.
كەشەگى ۇلى مۇحاڭ – مۇحتار اۋەزوۆتىڭ كوزىن كورگەن, تاۋمان اماندوسوۆتىڭ ءوزى «التاي» دەپ ەركەلەتكەن, تەمىربەك قوجاكەەۆتىڭ ۇزەڭگىلەس دوسى بولعان نار تۇلعا دۇنيەدەن ءوتىپ, ومىرلىك جارى, ءومىرىنىڭ مۋزاسى, قىز-جىبەگى – زاريا جەڭگەمىزدىڭ رۋحىمەن قايتا تابىستى.
قوش بولىڭىز, ۇستاز!
الماتى